ഗർബോ ഞായർ നോമ്പിലെ രണ്ടാം ഞായറാഴ്ച അല്ല. മ്ശർയോ മൂന്നാമത്തേതും അല്ല

പല പോസ്റ്റുകളിലും നോമ്പിലെ രണ്ടാം ഞായർ - ഗർബോ എന്നു കാണുന്നത് ശരിയായ രീതിയല്ല എന്ന് വിചാരിക്കുന്നു.

ഗർബോ ഞായർ രണ്ടാം ഞായർ ആകണമെങ്കിൽ കൊത്ത്നേ ഞായർ നോമ്പിലെ ആദ്യത്തെ ഞായർ ആകണം. എന്നാൽ കൊത്ത്നേ ഞായർ നോമ്പിലെ ഞായർ അല്ല. നോമ്പ് ആരംഭിക്കുന്നത് തിങ്കളാഴ്ചയാണ്. അതിനു ശേഷം വരുന്ന ആദ്യത്തെ ഞായർ ഗർബോ ആണ്. 

ശുശ്രൂഷാ സംവിധാനത്തിൽ യൂഹാനോൻ മാർ സേവേറിയോസ് തിരുമേനി ഊശാന പെരുന്നാളിൻ്റെ ശുശ്രൂഷാക്രമീകരണം അവതരിപ്പിക്കുന്ന ഇടത്തു പറയുന്നത് നോമ്പിലെ ആറാം ഞായറാഴ്ച എന്നാണ്. അതും ഗർബോ രണ്ടാം ഞായർ എന്ന പ്രയോഗം തെറ്റാണെന്നു തെളിയിക്കുന്നു. 

മലയാളത്തിൽ എങ്ങനെയോ വന്നു ചേർന്ന ഒരു പ്രയോഗമാകാം നോമ്പിലെ രണ്ടാം ഞായർ-ഗർബോ എന്നത്. പെങ്കീസായിൽ കാണുന്നതും കുഷ്ഠരോഗിയുടെ ഞായറാഴ്ച എന്നാണ് (ܚܕ ܒܫܒܐ ܕܓܪܒܐ). നോമ്പിലെ ഗർബോ ഞായറാഴ്ച അഥവാ കുഷ്ഠരോഗിയുടെ ഞായറാഴ്ച എന്നതാണ് ശരിയായ പ്രയോഗം. ഇനി എത്രാമത്തെ എന്നു കൃത്യമായി പറയണമെങ്കിൽ അത് വലിയനോമ്പ് ആരംഭിച്ച ശേഷം വരുന്ന ആദ്യത്തെ ഞായറാഴ്ചയാണ്.

ഡെറിൻ രാജു